Elbasymen birge –  jańa jeńisterge!

Tyńnan túren salǵan Prezıdent Memleket basshysy Nursultan Nazarbaevtyń «Nur Otan» partııasynyń sezinde kúlli qazaqstandyqtardyń usynys-tilegin eskere otyryp, saılaýǵa túsetinin málimdeýi barshamyzdy qýantty. Sondaı-aq, Prezıdent partııalas serikterine bes birdeı halyqtyq reformany júzege asyrý mindetin qoıdy. Bul – memlekettik qurylymdy kemeldendirýge jol ashatyn reformalar. Ásirese, memlekettik qyzmet, quqyqtyq sala men azamattyq sektordy jańǵyrtýǵa kóp kóńil bólinetinin ańdaýǵa bolady. Elbasy táýelsizdiktiń alǵashqy kúninen bastap parasatty da salıqaly saıasatymen elimizdi búkil álem qaýymdastyǵyna keńinen tanytty. Tyńnan túren salǵan Tuńǵysh Prezıdent táýelsiz memlekettiń basym baǵyttaryn nyǵaıtyp, el ekonomıkasyn eseleýge bar kúsh-jigerin jumsap keledi. Álemniń barlyq elderimen kóp vektorlyq dıplomatııalyq baılanys jasap, táýelsiz Qazaqstan memleketi Birikken Ulttar Uıymyna múshe boldy. Sonymen qatar, dúnıejúziniń aldynda kóregendik tanytyp, álemde birinshi bolyp ıadrolyq qarýdan bas tartty. Saıası ómirdegi mol tájirıbesi men bıik abyroıy jahandyq deńgeıdegi máselelerdi sheshýde aıqyn kórinýde. Elimizde saıası turaqtylyq pen qoǵamdyq kelisimdi saqtaý saıasaty erekshe ról atqarýda. Kóptegen ult ókilderin bir shańyraqtyń astyna jınap, búkil álemge yntymaq pen berekeniń úlgisin kórsettik. Búginde Qazaqstan beıbitshiliktiń ordasy retinde álemge keńinen tanylyp otyr. Bilim izdep, ǵylymmen aınalysýdy maqsat etken jastarǵa jan-jaqty qoldaý kórsetilýde. Sonyń bir jarqyn aıǵaǵy – «Bolashaq» halyqaralyq stıpendııasynyń taǵaıyndalýy. El tarıhynyń jańa betteri ashylyp, táýelsiz Qazaqstannyń Kók baıraǵy kókte jelbirep tur. Osynyń bári – Prezıdentimiz Nursultan Nazarbaevtyń parasatty saıasatynyń jemisi men tynymsyz eńbeginiń arqasy. Búginde álemdik daǵdarystyń kezekti tolqyny kúsh alýda. Osyndaı syn saǵatynda elimizdi asqaraly bıikterge bastaıtyn tarıhı tulǵanyń tóńiregine toptasýymyz ultymyzdy uıystyra, birligimizdi bekemdeı túsedi dep oılaımyn. Sháripbek ÁMIRBEKOV, Shákárim atyndaǵy Semeı memlekettik ýnıversıtetiniń rektory, saıası ǵylymdar doktory. Shyǵys Qazaqstan oblysy. Jarqyn bolashaqqa baǵyttady Elbasy Nursultan Nazarbaevtyń «Nur Otan» partııasy HVI sezinde sóılegen sózin muqııat tyńdadym. Osydan shırek ǵasyrdaı burynǵy ýaqytpen salystyrǵanda Qazaqstannyń qaryshtap damyǵanyna barlyǵy da kýá. Ol adamdardyń kúndelikti tirliginen, turmysynan baıqalyp turady. Elde júrgennen keıin barlyǵy bizdiń kóz aldymyzda. Mine, qazir kóktemniń kókózek shaǵynda da qınalyp otyrǵan eshkimdi kórmeısiń. Aýylda mal tóldep jatyr, jurttyń eti, aıran-súti bar. Eńbek etkenge eshqandaı tarshylyq joq. Elbasynyń bastaýymen elimizdegi sońǵy bes jyldaǵy ındýstrııalyq baǵdarlama ekonomıkalyq qaryshty damýdy qamtamasyz etkeni belgili. Keń-baıtaq Qazaqstannyń basqa shalǵaıyn aıtpaǵanda, Qostanaı óńirindegi óndiriste de, aýyl sharýashylyǵynda da, shaǵyn jáne orta bıznes salasynda da damý bar. Kóz de, kóńil de qýanady. Nursultan Ábishuly halyqtyń aldyna shyqqan saıyn birlik, dostyq, tynyshtyq týraly aıtady. Halqymyz talaı qıyndyqty bastan keshirgen. Sonaý 90-shy jyldardyń ózinde jurt ekonomıkalyq daǵdarysty sezindi, biraq Elbasymyzdyń arqasynda saıası, rýhanı daǵdarystan aýlaq boldy. Sonyń arqasynda birligimizge syna túspeı, barlyq qıyndyqty artqa tastaǵan elmiz. Saıası daǵdarǵan, berekesizdik jaılaǵan elderdegi qantógisti estigende janyń túrshigedi. Elbasy «Nur Otan» partııasynyń sezinde sóılegen sózinde azamattyq qoǵamdy damyta túsýdi aıtty. Men ony Elbasynyń ómirdiń, ýaqyttyń tamyrshysyndaı dana saıasaty dep bilemin. О́ıtkeni, azamattyq kúshter qoǵamdyq qarym-qatynastardy damytady. Sonyń arqasynda qazaq jerin jaılap, otyn ottap, sýyn sýlap otyrǵan ult-ulystar arasyndaǵy dostyq, birlik nyǵaıa túsedi. Elbasy aıtqan «Máńgilik El» ıdeıasynyń mán-mańyzy osy bolmaq dep bilemin. Oǵan meniń ózimniń jeke mysalym da bar. Osy jyldyń basynda «Shańyraq-Qostanaı» atty qoǵamdyq birlestik qurdym. Qostanaı aýdandyq máslıhatynyń depýtatymyn, «Altyn alqaly» kópbalaly anamyn. Aıtpaqshy, elimiz boıynsha moınynda «Altyn alqasy» bar depýtat áıel men ǵana ekendigimdi maqtanysh tutamyn. «Shańyraq-Qostanaı» qoǵamdyq birlestigi arqyly Qazaqstan jastaryna halqymyzdyń dástúr-saltyn nasıhattaýdy, eń bastysy, umyttyrmaýdy, patrıottyq tárbıeni shegeleýdi maqsat tuttym. Jaqynda «Dostyq úıinde» kóp­balaly analar forýmyn ótkiz­dik. Oǵan tek qazaq áıelderi ǵana emes, Qos­tanaıdaǵy barlyq ulttar­dyń kópbalaly ókilin shaqyrdyq. Jınalǵandar osy sharany tolqy­nystan kózine jas alyp otyryp, qyzyqtady. О́mirge urpaq ákelý, bala tárbıeleý, otbasyn saqtaý, dás­túrlerdi, adamgershilikti ulyqtaý eshqandaı ultqa-ulysqa bólinbeıtin qasıetti is. Qoǵamdy zııaly, zııat etetin ózimiz emes pe? Elbasy nurotandyqtar sezinde halqyn osyndaı jarqyn baǵytqa baǵyttady. Qarlyǵash BALAPANOVA. «Shańyraq-Qostanaı» qoǵamdyq birlestiginiń jetekshisi, kópbalaly ana. QOSTANAI. О́te kerek úderis Ár ýaqyttyń óz talaby bolady desek, búginde álem ekonomıkasy qubylmaly jaǵdaıdy bastan keshýdegi shaqta onyń jaǵymsyz yqpalyna jol bermeý, taǵy bir synǵa tótep berý asa mańyzdy másele bolyp turǵandyǵy málim. Bul jóninde Elbasy N.Á. Nazarbaev «Nur Otan» partııasynyń sezindegi sózinde «Bolashaqtaǵy basty mindet ekonomıkalyq damý serpinin qamtamasyz etý bolyp otyr. Jumystyń qorytyndylary ekonomıkany ártaraptandyrýǵa jańa 3-4 eksporttyq ónimderdiń týyndaýy bolýǵa tıis», dep atap kórsetti. Bizge osynaý mindet, ásirese, Qa­raǵandy oblysyna óte qatysty bolyp kórinedi. О́ıtkeni, elimiz ındýs­trııasynyń tiregi jáne kóshbasy retin­de óndiristi aımaqtyń basty salany damytýdy kúsheıtýge múmkindigi bar, qosar úlesi de jetkilikti dep sanaı­myz. Buǵan baılanysty úlken jumys­tar júgin arqalaı alary talassyz. Memleket basshysynyń bul tur­ǵyda oılaǵany tereńde deýge bolady. Máselen, eksporttyq ónim óndirý kólemin ulǵaıtý ekonomıkany kemeldendirý keleshegine kepildik beretindigin, qazaqstandyq taýarlar men zattardyń syrtqy naryqta ótimdi bolýy zamanaýı óndiris oryndarynyń ulǵaıýyna, básekelestikke kúrestiń kú­sheıýine jeteleıtindigin, paıda kózi keńeıip, jurttyń ál-aýqaty jaq­sa­ratyndyǵyn óńirdegi osyǵan baılanysty ister kórsetip keledi. Búginde jergilikti kásiporyndar tańbasy basylǵan jylý jáne munaı qubyrlary, telekommýnıkasııalyq symdar, qurylys materıaldary, dárilik preparattar, kámpıtter, et pen sút ónimderi birqatar elder tutynýshylar suranysyna ıe bolyp otyrýy sonyń naqty nyshandarynyń biri. Al, sonymen birge, áli de barynsha paıdalanýǵa qol uzarmaı jatqan ishki rezervter az emestigin aıtpasqa bolmaıdy. Mysal úshin kezinde negizi qalanǵan shahta tehnıkalaryn, mashına jasaýdy qalpyna keltirý arqyly eksporttyq áleýetti budan da joǵary deńgeıge kóterýge múmkindik barshylyǵy oılantarlyq jaı. Shıkizatqa ǵana arqa súıeýdiń ýa­qyty ótýin ómirdiń ózi kórsetip otyr. Eldi órkendetý jolyndaǵy reformalardyń Prezıdentimiz alǵa qoıǵan atalǵan óte tıimdi modeli jańarýǵa, jańǵyrýǵa bastaı túser jol dep bilemiz. Oblystyq máslıhat depýtattary osy maqsatqa baǵyttalǵan jobalardy birinshi kezekte qoldaýǵa daıyn. Ekonomıkanyń jańasha damýyna asa kerek úderis. Ǵazym JARYLǴAPOV, oblystyq máslıhattyń depýtaty. Qaraǵandy oblysy, Jańaarqa aýdany. Jasampazdyqtyń jarqyn joly «Nur Otan» partııasynyń kezekti HVI sezin asyǵa kút­ke­nimiz shyndyq. О́ıtkeni, onda partııa Tóraǵasy Nursultan Nazarbaevtyń aldaǵy pre­zı­denttik saılaýǵa úmitker retinde «Nur Otannyń» atynan túsetini tarazyǵa salynatynyn sezdik te. Memleket basshysynyń bul usynysqa kelisim berip, qa­byl alǵany óte durys boldy. Bul barsha qazaqstandyqtardy qýa­nyshqa bóledi dep shyn júrekten aıta alamyn. Búgingideı daǵdarysty kezeńde eldiń tizginin N.Na­zar­baevtaı senimdi tulǵanyń ustaǵany utymdy. Elbasy osyndaı tarıhı da taǵdyrly qadamy arqyly halqynyń qamyn oılaıtyn, eliniń erteńine qyzmet etýge daıyn ultynyń ulaǵatty uly ekenin taǵy bir dáleldedi. «Nur Otan» partııasynyń kezekti HVI sezinde sóılegen sózin teledıdar aldynda tapjylmaı otyryp kórip, tyńdadym. Ony da mise tutpaı, basylymdardan oqyp, aıryqsha tushyndym. Muny naǵyz eliniń múddesin ózinen joǵary qoıatyn ulaǵatty da tulǵaly azamattyń adamı aqıqaty retinde baǵalap qana qoımaı, Nursultan Ábishulynyń Qazaqstandy álemdik daǵdarys jaǵdaıynda da damýdyń dańǵyl jolymen alyp shyǵatynyna bek sendim. Elbasy óziniń «Barshaǵa birdeı osy zamanǵy memleket: bes halyqtyq reforma» atty sózinde tarıhı qysqa kezeńde elimizdiń uly joldy júrip ótkenin, táýelsizdik jyldary ishki jalpy ónim 20 ese óskenin, 2010 jyldan beri halyqtyń tabystary – 43, al eńbekaqylary 64 paıyzǵa óskenin atap ótti. Ekonomıkalyq ilgerileýdiń mundaı qarqynyn kúndelikti ómirimizde kórip te júrmiz. О́z sózinde Elbasy «...О́z tabystarymyzdy arqaý etip, ózimizdiń memlekettigimizdi damytý úshin bizdiń alǵa qaraı qozǵalýymyz kerek. Sondyqtan da men bes ınstıtýttyq reformany alǵa tartamyn», deı kelip, olardyń árqaısysyn júzege asyrýdyń joldaryna toqtaldy. Sonyń ishinde kásibı jáne avtonomııaly memlekettik apparatty qalyptastyrý, ekonomıkalyq ósim úshin negiz bolatyn zańnyń ústemdigin qamtamasyz etý, ındýstrııalandyrý jáne ártaraptandyrý, bolashaǵy birtutas ult pen transparentti jáne esep berýshi memleket qalyptastyrýdyń qaǵıdattaryna toqtaldy. Osy rette jumylǵan ju­dyryqtaı bir jerden tabylý, sózimiz ben isimizdiń úıle­simin keltirý, ilgeri damýǵa árqaı­sy­myz barymyzsha úles qosý – barshamyzdyń paryzymyz. Elimizdiń erteńin aıqyndaıtyn jasampazdyq joly da osyny mindetteıdi. Qasymjan BAISADAQOV, Jýrnalıster odaǵy Aqtóbe oblystyq fılıalynyń tóraǵasy. AQTО́BE. Memleketke qyzmet – qoǵam birligin nyǵaıtý kilti Biz budan jıyrma tórt jylǵa jýyq ýaqyt buryn derbes memleket atandyq. Bul tek onyń bastaýy ǵana. О́ıtkeni, memlekettilikke qol jetkizý bar da, onyń saqtalýyn qamtamasyz etý jáne odan ári nyǵaıtý min­deti bar. Ári munyń ózi mem­lekettilikke ıe bolýdan artyq bolmasa, bir mysqal kem túspeıtin kúrdeli de jaýapty, sonymen birge, syndarly ýaqyt aralyǵyn qajetsinetin uly is. Qazirgi kezdegi jahandyq syn-qaterler álemdegi 200-den astam eldiń qaı-qaısyna da óziniń salqyny men zardabyn tıgize alatyny belgili bolyp otyr. Memlekettilikti nyǵaıtý men odan ári damytýdyń qajettiligi dál osyndaı kúrdeli kezeńde odan ári tereńdeı túsedi. Sondyqtan da sezde Pre­zıdent, «Nur Otan» par­tııa­synyń Tóraǵasy Nursultan Nazarbaev memlekettilikti damytýdyń bes birdeı halyqtyq reformasyn taıǵa tańba basqandaı belgilep berdi. Bir sózben aıtqanda, bul – alǵa qaraı úzdiksiz qozǵalý de­gen sóz. Memleket basshysy osy reformanyń ishinde ekonomıkalyq baǵdarlamalardy sapaly túrde júzege asyrý qajettiligine aıryqsha mán berdi. Bul úshin qazirgi zaman­ǵy kásibı jáne avtonomııa­ly memlekettik apparat qalyp­tas­tyrý kerektigin alǵa tartty. Osy turǵyda ákimshilik mem­lekettik qyzmet aldaǵy kezde saıası deńgeıge táýeldi bolmaýy kerek. Prezıdent tujyrymy osyndaı. Mundaǵy maqsat – bi­reý ǵana. Eger taza kásibı túrdegi basqarý isine saıasattyq belgi men saıasattandyrý salqyny aralasyp ketip jatsa, jap-jaqsy bastalǵan is jarty jolda qalyp qoıdy deı berińiz. Mem­lekettik apparattaǵy belgili bir qamqorshynyń aınalasynda komanda qalyptasatyn bolsa, bul ádet memlekettilikke kóleń­kesin túsirmeı qoımaıdy. Ári jem­qorlyq úshin qolaıly jaǵdaı týǵyzady. Tamyr-tanystyqty týyndatady. Eń qaýiptisi – mundaı táji­rı­bede mańyzdy memlekettik baǵ­darlamalar men jobalar túrli deńgeıdegi jekelegen sheneýnikterdiń biliksizdiginen taqyrshaqqa otyrýy ábden múmkin. Bul teris jáıtter men qubylystar memleket basshysyna da qupııa emes eken. Elbasynyń keshegi osy túıindi sózinen keıin memlekettik qyz­m­etke tamyr-tanystyqpen kelý birtindep joıylady dep oılaımyz. Respýblıkamyzda memlekettik qyzmet týraly jańa zańdy ázirleý jáne sybaılas jemqorlyq týraly zańǵa ózgerister engizý qajettiligi de osyndaı bıik talaptardan týyndap otyrǵanyn túısindik. Bizde memlekettik qyz­metshilerge aqy tóleý tártibi buǵan deıin teńgermeshildikke negizdelip kelgeni jasyryn emes. О́ıtkeni, olardyń bárine birdeı kólemde jalaqy berilip keldi. Ári onyń mólsheri de joǵary emes ekendigi kim-kimge de belgili. Endigi jerde Elbasy eńbekke aqy tóleýdiń jańa júıesin engizý qajettiligin alǵa tartty. Ol ár jyldardaǵy istiń nátıjesine baılanysty bolmaq. Iаǵnı, ákimshilik qyzmetker jaqsy jumys istese, jalaqysy kóterilip, iske saldyr-salaq qarasa, eńbekaqysy tómendemek. Prezıdent «Nur Otan» partııa­synyń XVI sezinde usynǵan mundaı tásil óte ádiletti dep bilemiz. Qysqasy, memleketke adal qyzmet etý qazaqstandyq qo­ǵamnyń birligin nyǵaıtýǵa qajetti faktorlardyń biri bolmaq. Prezıdent málimdegen halyqtyq reformany júzege asyrýdyń basty bir kilti de osy tustan tabylatyny talassyz. Nurbek SAIYNOV, Qaratóbe aýdanyndaǵy Muhıt orta mektebi, deneshynyqtyrý pániniń muǵalimi. Batys Qazaqstan oblysy. Reformalar qajettilikten týyndaıdy Kúni keshe ótken «Nur Otan» partııasynyń XVI sezinde Elbasy Nursultan Nazarbaev eldikti, memlekettilikti nyǵaıtýǵa arnalǵan memlekettik basqarý jáne ekonomıkalyq damý, orta tap qurý salasynda ınstıtýttyq reformalardy atady. Bul reformalar qazirgi kezde asa qajet máseleler dep oılaımyn. О́ıtkeni, aınala tynymsyz, álem bolsa mınýt saıyn ózgerip jatyr. Sondyqtan, elimizde júzege asyrylý ústindegi ekonomıkalyq baǵdarlamalardy óz deńgeıinde, órkenıet talaptaryna saı júzege asyratyn kásibı, zamanaýı avtonomdy memlekettik apparatty qurý kerektigin aıtty. Memlekettik qyzmetshiler korpýsyn kásibı jáne avtonomdy etý asa mańyzdy. Al saıası qyzmetshiler úshin bonýs jáne ákimshilik qyzmetshilerge ekonomıkadaǵy qol jetkizgen tabystary, olardyń qyzmetiniń nátıjeliligi úshin syıaqy tóleý kerek degen yntalandyrý bolsa, onda, árıne, el ekonomıkasynyń órkendeýine úles qosatyn patrıot adamdardyń alǵa shyǵary sózsiz. Endi bir tamasha aıtylǵan sóz memlekettik qyzmetke qabyldaý úshin biliktilik talaptaryn kúsheıtý kerek degeni. Barlyq deńgeılerde attestattaý ótkizý kerek degen tamasha sózderdi óz basym qos qoldap turyp qoldaımyn. Bizdiń elge eń keregi osy – bilikti mamandar jáne olardyń qalqada qalyp qoımaýy. Rasynda da, memlekettik qyzmet týraly óz elimizge laıyqty jańa zań qabyldaý qajettiligi týyndap otyr. Polısııaǵa da kásibı-psıhologııalyq irikteýdiń jańa júıesin engizý, polıseılerdiń biliktiligin únemi arttyrýdy jáne olardyń óz kásibıligin dáleldeýleri jaıly aıtqany da mańyzdy. Bizder, oqytýshylar únemi stýdent jastar arasyndamyz. Bilgenimizdi úıretip, olardyń órkenıet talaptaryna saı bilimdi ǵylym arqyly alýlaryna qaraı sabaq berip, dárister oqımyz. О́ıtkeni, qazirgi zaman talaby joǵary. Bizdiń elge – bilikti, bilimdi mamandar qajet. Zamana úderisinen qalmaýymyz kerek. Stýdent jastardyń oı-sanasynda elim, jerim degen patrıottyq sezim, bolashaqqa degen senim, eldik múdde qalyptasty, biz soǵan qýanamyz. Elbasy jas qazaqstandyqtarǵa bilim berý jáne tárbıeleýdiń mańyzdylyǵyna mán berip keledi. Indýstrııalandyrý baǵdarlamasy sheńberinde ǵylymnyń ekonomıka salalarymen jáne mamandar daıyndaýmen baılanysty qamtamasyz etiletin 10 JOO anyqtaldy. Solardyń biri – Sultanmahmut Toraıǵyrov atyndaǵy memlekettik ýnıversıtet. Sóıtip, jaýapkershilik bizge, ıaǵnı ýnıversıtet ǵalymdary men ustazdaryna da júkteledi. Elbasy usynǵan reformalar qajettilikten týyp otyr, bizge endi osy qajettilikter ornyn toltyrýy­myz kerek. Qaıyrolla AQAJANOV, Sultanmahmut Toraıǵyrov atyndaǵy memlekettik ýnıversıtettiń professory. PAVLODAR. Sony mindet, jańa maqsat Osydan 15 jyl buryn Memleket basshysy Nursultan Nazarbaev Soltústik Qazaqstan oblysyna kelgen jumys saparynda «Mámbetov jáne K» komandıttik sharýashylyǵyna arnaıy soqqan. Ýaqytynyń tyǵyzdyǵyna qaramastan, kombaınshy-mehanızatorlarmen áńgimelesip, kúzgi oraq naýqanynyń barysymen tanysqan. Sol joly eldi mekenderdi damytýǵa baılanysty keleli oılarymen, aldaǵy josparlarymen bólisip, aýyldyqtardyń ómir sapasyn jaqsartýǵa erekshe nazar aýdarǵan. Keıin Elbasymen kezdesken Meńgeser jazyǵyn turǵyndar «Prezıdent alqaby» atap ketken. Jyl saıyn gektar ónimdiligi 20-25 sentnerden aınalyp júr. Bul oqıǵany erekshe tebirenispen eske alyp otyrǵan sebebim, Prezıdenttiń kez kelgen Joldaýyn, baǵdarlamalaryn, sóılegen sózderin alyp qaraıyq, myńǵyrtyp mal, jaıqaltyp astyq ósirip, el yrysyn telegeı-teńizdeı tasytyp júrgen aýyldyqtar máselesi esh shet qalǵan emes. Keshe ótken «Nur Otan» partııasynyń sezine usynylǵan bes halyqtyq reforma «Qazaqstan-2050» Strategııasynyń qısyndy jalǵasy retinde atap kórsetilip, alǵa qaraı qaryshty qadam jasaý mejeleri belgilendi. Onyń ishinde shaǵyn jáne orta bıznes, agrarlyq sektor salalaryna erekshe kóńil bólindi. Neǵurlym damyǵan 30 memlekettiń qataryna qosylýǵa kúsh-jigerimizdiń de, qarym-qabiletimizdiń de, ekonomıkalyq múmkindikterimizdiń de, basqa áleýetterimizdiń de jetetinin qazirdiń ózinde ańǵaryp otyrmyz. Táýelsizdik jyldary ishinde IJО́ kólemi 20 ese ósip, byltyr jan basyna shaqqanda 13 myń dollardy quraǵan. 2010 jyldan beri halyqtyń tabysy – 43, aılyq eńbekaqy 64 paıyzǵa, memlekettik áleýmettik járdemaqylar 1,4, eń tómengi zeınetaqy 1,8 ese ósken. Áleýmettik jańǵyrtý ózgeristerin, onyń jarqyn mysaldaryn jergilikti jerlerden de kóptep keltirýge bolady. Máselen, sońǵy ýaqyt bederinde bizdiń sharýashylyqqa qarasty eki eldi mekende zamanaýı sport zaldary, shaǵyn ortalyqtar paıdalanýǵa berildi. Jazǵy oıyn-saýyq alańy, jastar ortalyǵy qalpyna keltirildi. Mektepter men mádenıet úıi kúrdeli jóndeýden ótti. Eńbek adamdary joǵary jalaqyǵa ıe. Olarǵa arnalyp 20-ǵa jýyq baspana boı kóterdi. Seriktestikte eginshilikpen qatar, mal sharýashylyǵy da órkendep keledi. AQSh-tyń Soltústik Dakota shtatynan satyp alynǵan aberdın-angýs tuqymdy 200 bas taıynsha 500-ge jýyqtady. Reprodýktor sharýashylyq mártebesi berilip, oblysta atalyq maldardy satýǵa arnalǵan tuńǵysh aýksıon ótkizildi. Kóp jylǵy eseli eńbegi úshin komandıttik seriktestiktiń bas dırektory Erkebulan Mámbetov Táýelsizdik saraıynda bıznestiń áleýmettik jaýapkershiligi atalymy boıynsha «Paryz» syılyǵynyń qola júldesin aldy. Esimi «Mesenattyń altyn kitabyna» jazylyp, kúmis medalǵa ıe boldy. Men ózim Elbasynyń qolynan elimizdiń eń joǵary nagradasy – «Otan» ordenin alǵanymdy eshýaqytta umytpaımyn. Eńbektiń elengeni, mańdaı terdiń ótelgeni osy emes pe! Nursultan Ábishuly partııanyń joǵary forýmynda jarııalaǵan saılaýaldy baǵdarlamasynda barlyq derlik memleketter bastan ótkerip jatqan saıası-ekonomıkalyq syn-qaterlerge jol bermeýdiń, aldyn alýdyń jańa mindetterin júktedi. Sapaly ósim men ekonomıkany ártaraptandyrýǵa qol jetkizý úshin ındýstrııalandyrý baǵdarlamasyna erekshe ekpin túsirildi. Onyń ýaqtyly jáne qajetti shara ekeni esh talas týdyrmaıdy. Búginde aýyl sharýashylyǵy shıkizatyn qaıta óńdeý sektoryn jańa keshendi jobalar men baǵdarlamalar negizinde damytýdyń mańyzy zor. Sol sebepti jańa jumys oryndaryn qurýǵa, eldiń eksporttyq áleýetin keńeıtýge aıryqsha basymdyq berilgeni qoldaýǵa turarlyq. «Nurly Jol – bolashaqqa bastar jol» Joldaýynda atap kórsetilgen basym qaǵıdattardyń ishinde aýyldyqtar úshin sapaly aýyz sý men jol jaıy qashanda ózekti sanalady. Meńgeserge torapty sý qubyry jetkizilip, sý munarasy ornatyldy. Qubyr tartýǵa sharýashylyq esebinen qarajat bólinip, 240 úıge tirshilik nári engizildi. Endi ozyq joba aıasynda Bekseıit aýylynyń turmysy túzeletin bolady. Stanovoe – Meńgeser baǵytyndaǵy joldy qalpyna keltirý jumysy josparly júrgizilýde. Elbasynyń «Bes halyqtyq reformanyń árqaısysy – el úshin orasan zor syn-qater jáne úlken jumys. Mundaı reformalar tek bılik pen halyqtyń myqty erik-jigerimen ǵana qamtamasyz etile alady», degen sózderi árqaısysymyzǵa úlken oı salýy tıis. Arystan JÚNISOV, «Mámbetov jáne K» komandıttik seriktestiginiń dırektory, «Otan» ordeniniń ıegeri. Soltústik Qazaqstan oblysy, Mamlıýt aýdany. Sýretti túsirgen Talǵat TÁNIBAEV. Erteńimiz nurly bolmaq «Nar jolynda júk qalmaıdy» deıdi halyq danalyǵy. «Nur Otan» partııasynyń XVI se­zin­de kórnekti aqynymyz Aqush­tap Baqtygereevanyń Elba­syna arnap sóılegen sózine tánti boldyq. Eldiń zııalysy, halyqtyń qamyn jeıdi degen ápkemiz búginimizden erteńimizdiń nurly bolatyndyǵyn, ol úshin Elbasymyzdyń tóńiregine toptasýymyz kerektigin ádemi jetkizdi. Búginde «Qazaqstan – Nursultan» degen egiz uǵym bar qazaqtyń maqtanyp aıtar sózi. Mundaıda keýdeńdi Otanyńa degen súıispenshilik kerneıdi. Eldiń qalaýymen Nursultan Ábishulynyń kezekten tys prezı­denttik saılaýǵa túsýge keli­sim bergeni memleketimizdiń erteń­ge kúnge degen úlken seni­mi, bolashaǵymyzdyń kemel­de­nýiniń kepili. Basqa memle­ket­terdiń de kógerip, kóktegenin tileıik, dál qazir Qazaqstannyń daǵdarys daýyldaryna soq­tyr­mas temirqazyǵy bar. Ol – «Qazaqstan-2050» Strategııasy, bir jaǵadan bas, bir jeńnen qol shyǵaratyn, eldiń basyn birlikke uıystyratyn uly maqsat – «Máńgilik El» ıdeıasy. Búginde dos ta, dushpan da moı­yn­daıtyn aqıqat – Qazaqstan nurly bolashaqqa Nursultan Nazarbaevpen birge baǵyt ustanǵandy qalaıdy. Sezden keıin basqarmada jıyn ótkizip, Prezıdenttiń Qazaq­standy órkendetý jolyndaǵy bes halyqtyq reformasy tal­qylandy. Ońtústikte 3 mıllıonǵa jete halyq bar. Sportshylar – sol halyqtyń eń úlken bólshegi. Barshasy Nursultan Nazarbaev jańa bıikterge, jańa jeńisterge bastaıdy, saılaýǵa qol jııamyz dep qulshynyp otyr. Álibek NURTAEV, Ońtústik Qazaqstan oblystyq sport basqarmasynyń basshysy. ShYMKENT. Turaqty damýdyń kepili Eń aldymen, «Nur Otan» partııasynyń XVI sezi óte joǵary uıymdastyrýshylyq deńgeıde ótkenin atap aıtqym keledi. Ekinshiden, «Nur Otan» par­tııasy elimizdiń eń úlken saıa­sı uıymy bolǵandyqtan onyń uıymdastyrǵan sezi de Qazaq­stannyń qoǵamdyq ómi­rinde óte eleýli oqıǵa retinde baǵalanady. Al, úshinshiden, saıası turǵydan alǵanda, sezde partııa Tóraǵasy Nursultan Nazarbaevtyń sóılegen sózin memlekettik baǵ­dar­lama mazmunyndaǵy qujat retinde qabyldadyq. Árıne, sezge jınalǵan qaýymdy eń birinshi «Partııa Tóraǵasy prezıdenttik saılaýǵa úmitker retinde túsýge kelisim bere me, álde basqa oı aıta ma?» degen saýal tolǵandyrǵany jasy­ryn emes. Elbasy óz sózinde bul máselege óte tereń tolǵa­nyspen qaraǵanyn jáne halyq­tyń pikirinen asa almaıtynyn jetkizdi. «Biz alǵa jyljýymyz qajet. Sondyqtan men aldymyz­da turǵan kúrdeli, jańa mindetterdi iske asyrý úshin óz kandıdatýramdy usyný jóninde sizdermen kelisetin bolarmyn»,– dedi Nur­sultan Ábishuly. Tutastaı alǵanda, Elbasy óz sózinde osyǵan deıingi ba­ǵyt-baǵdarymyzdan aınymaı, ózimizdiń damý jolymyzben jú­re beretinimizdi aıtty. Sebebi, ha­lyqqa eń keregi – turaqtylyq pen beıbit ómir. Al Elbasynyń elimiz táýelsizdik alǵaly júrgizip otyrǵan saıasatynyń basty dińgegi – turaqtylyq. Tarıhı keńistik turǵysynan qaraǵanda, bizdiń Táýelsizdik alǵan ýaqytymyz qas-qaǵym ǵana sátti quraıdy. Elbasy osy bir azǵantaı mezetti joǵaltpaı, Mángilik El ıdeıasymen ushtastyryp, ony júzege asyrýda árbir qazaqstandyq azamat ultyna, násiline, dinine qaramaı eńbek etip jáne ony kóziniń qarashyǵyndaı saqtaýǵa mindetti ekenin jetkizdi. Elbasynyń atap ótken bes halyqtyq reformasy Qazaq­stannyń zamanaýı memleket retinde damýynyń birden-bir kepili bolady dep senemin. Ási­rese, kókeıge qonǵany – sot júıesine qatysty aıtylǵan sózderi. Buryn-sońdy qoǵamdyq ómirdegi syn pikirlerden tys qalyp qoıatyn júıe ashyq bolýy kerek ekenin Prezıdent erekshe atap ótti. Bul qaǵıda Qazaqstanda memleketke degen halyq seniminiń artýyn, naryqtyq qatynas sýbek­tileri bolyp tabylatyn kásip­kerlerdiń teńdigin, olardyń men­shik quqyǵyn qamtamasyz etetin jalpyqoǵamdyq qatynastardyń ádildik negizinde damýyna jol ashatyn birden-bir shart dep túsinýge bolady. Jalpy, Elbasy elimizdiń bolashaǵyna qatysty kóptegen máselelerdi qozǵady. Al bul máselelerdiń barlyǵy keleshekte júzege asyrylady degen oıdamyn. Nurhan JÁLIEV, «Qazaqstan saıasattanýshylar Kongresi» Qyzylorda oblystyq fılıalynyń dırektory. QYZYLORDA. Eldi eńbek etýge shaqyrdy «Nur Otan» partııasynyń XVI sezinde Elbasy kóptegen máselelermen qatar qazaqstandyq birtektilikti odan ári nyǵaıtý qajet ekenine aıryqsha toqtaldy. Ol azamattyq qaǵıdatyna negizdelýi tıis. Barlyq azamattar quqyqtyń bir kólemin paıdalanýy, jaýapkershiliktiń bir júgin arqalaýy jáne teń múmkindikke qoljetimdilikti ıelenýi kerek. Máńgilik El ıdeıasy arqaýyndaǵy jumyldyrýshy qundylyqtar – azamattyq teńdik; eńbeksúıgishtik; adaldyq; oqymystylyq pen bilimdi qaster tutý; zaıyrly el – taǵattylyq eli. Osyndaı jaǵdaıda azamattyq ornyqty jáne tabysty memlekettiń eń senimdi irgetasy bolady. Shynynda, el bolashaǵy jas­tardy bilim alýǵa, eńbek etýge, adal bolýǵa tárbıeleýimiz kerek. Elbasy aıtqan Máńgilik El ıdeıasyn jas urpaqtyń sanasyna tereń uıalatýymyz qajet. TarMPI oqytýshylary talapkerlerge jan-jaqty bilim berýmen qatar, tárbıe jumystaryn da tereń de maǵynaly júrgizýde. TarMPI basshylyǵy bilimgerlerdiń tereń bilim alyp, jan-jaqty tárbıelenýine, ǵylymmen aınalysýyna barlyq jaǵdaı jasaǵan. Jaqynda elimizdiń tarıhyn tereń zertteý maqsatynda bilim ordasynda Balasaǵun atyndaǵy kóne tarıhty zertteý ortalyǵy ashyldy. Bul ortalyqta oqytýshylar men bilimgerler ońtústik óńirdiń tarıhyn zerttep, ǵylymmen aınalysýǵa múmkindikteri mol. Qazaq eliniń, halyq tarıhynyń tereńde, kóneden kele jatqanyn ǵylymı derekter dáleldeıdi.  Oǵan mysal elimizdiń ár óńir­inde tabylyp jatqan tarıhı qun­dy jádigerler – «Altyn adam­dar». Bul qazaq halqynyń kóne ult ekenin, óz memleketi jáne qa­lalary bolǵandyǵyn dáleldeıdi. Elbasy aıtqandaı, saılaý qur ánsheıin saılaý ótkizý úshin emes, eldi birlikke shaqyryp, jurtty eńbekke uıytý úshin bolady. Endeshe yntymaǵy men birligi jarasqan el halqy saılaýda Elbasyn qoldaıtynyna tolyq senimdimin. Baný MEIIRBEKOVA, Taraz memlekettik pedagogıkalyq ınstıtýtynyń praktıkalyq shetel tilderi kafedrasynyń oqytýshysy. Jambyl oblysy.